Méi ass et net
aus de Programme vum Kabaret Sténkdéier
vun 2006 bis 2010



Tom Kraemer
Remy Kraus
Roland Meyer




Auswiel vun den Texter

Ass näischt an der Zeitung?

 

2010 – Et geet biergop

4 000 000 Frühlingsrollen

Am Prisong

Eng Dixistoilette am Mëttelalter

Lëtzebuerger  Diplomatie

Life Aid Lëtzebuerg

Metz-Lëtzebuerg

Nomen est Omen

Op der schifer Bunn

Réckruffaktioun

 

2009 – Vir bäi an hanne widder

Een ondankbaart Vollek

Enfants relais

Lidd vum Rita a vum Lynn

Faul Biren

Handymania

Joerhonnertreform

Kee Fest ouni Navette

Navettelidd

Mëllechbauer

Personal Trainer

Sensibiliséierungscampagne

 

2008 – Kreessverkéier

385 Hektar

E Bild vun engem Mann

Ecole Pilote

Ee Flick wéi en am Buch steet

Lifelong Learning

Stacklëtzebuerger

Tourismusmagnéit Euthanasie

Unesco

Virfreed

 

2007 – Dien éischten ass vir

5 Stonnen a 17 Minutten

D'Chamber op Weltrees

Eng nei Fuckultéit

Null - Null

Pharma-Boom

Top 5

Volltanken

 

 

2006 – Net mäi Béier

Flickeschoul

Foire-Fouille

Hei sidd Dir richteg!

Kapp oder Mënz ?

Krank Dauf

Présentez armes!

Vun 0 an de Krankeschäin

Wat Zäiten!

 

 

Ass näischt an der Zeitung?

„An der Equipe huet sech zanter 2000 zum Gléck net vill geännert. Op der Bühn sti mam Michèle Turpel, Raymond „Berti" Bertemes, Pierre Alzin an Tom Kraemer véier Leit, déi mëttlerweil esou gutt openeen agespillt sinn, an déi och esou genee wëssen, wat se maachen, datt et fir mech an de Prouwen eng Freed ass, fir mat hinnen ze schaffen, an datt et fir Iech, léif Frënn vum Kabaret Sténkdéier, grad esou eng Freed dierft sinn, hinnen nozekucken an nozelauschteren."

Esou séier kann et goen! Am Juni 2006 hunn ech dës Wierder geschriwwen, am Virwuert vun eisem zweete Buch „Gutt ze wëssen", an deemools war ech iwwerzeecht, datt sech dorunner net vill ännere géif. Mee Quetschen och! Datt dat heiansdo méi séier geet wéi ee mengt, hunn ech elo erlieft.

Well d'Michèle Turpel iwwer Joeren déi eenzeg Fra am Ensembel war, hu mir 2007 decidéiert, d'Géraldine Posing derbäizehuelen. Hatt ass jonk an huet eiser Equipe guttgedoen: alles ass e bësse méi lieweg, méi wibbelech ginn. Mir hunn all gespuert, datt dat genee dat war, wat mir gebraucht hunn.

Wéi de Pir Alzin sech dunn iewer entscheed huet, net méi matzemaachen, well him dat alles zevill ginn ass, ware mir méi oder manner geschockt! Ee Moment hu mir am Eescht driwwer nogeduecht, ob mir net besser hätten, d'Bengele bei d'Tromm ze geheien an de ganze Kabaret un de Nol ze hänken. Dat hu mir iewer zum Gléck net gemaach, a mam Nico Dabé hu mir en Talent fonnt, dat alles hat, wat eis bis dohinner gefeelt huet. Den Nico ass immens villsäiteg, ka sech op all Roll aloossen a schreckt och net viru Parodien zréck. Hien huet déi fir de Kabaret esou wichteg Dugend, sech selwer op den Aarm ze huelen.

Mir hunn ni probéiert, de Pir ze ersetzen, hien ze imitéieren, well et ass net méiglech, ee wéi hien ze ersetzen. Mee den Nico ass vun Ufank u säi Wee gaangen an huet eis a bestëmmt och Iech, léif Lieser, esou vill Freed gemaach, datt mir all hoffen, datt hien nach laang wäert derbäi sinn.

De Karussell huet weider gedréint. No der Produktioun vun 2008 sot d'Michèle Turpel, hatt kënnt dat Joer drop net derbäi sinn, well hatt en anere Projet hätt. Och dat war dien éischte Moment fir eis wéi ee Schlag an d'Genéck. Nach ee vun dienen éischten, nach eent vun dienen, déi de Kabaret Sténkdéier zu diem gemaach haten, wat en haut ass, dat Raute wénkt. Wéi sollte mir an esou kuerzer Zäit esou vill Changementer ewechstiechen? Sollten d'Leit sech iwwerhaapt nach mat esou enger verännerter Equipe kënnen ufrënnden, identifizéieren?

D'Irène Zeimes war eisem Public schonn zanter de fréien 2000er Joeren ee Begrëff. A wéi hatt zu diem Ament konnt zréckkommen, du war ech mer sécher, datt mir och gingen dëse schwéiere Moment iwwerstoen.

An esou ass et och komm! Zanter 2009 spille mir elo mat enger „neier" Equipe, an dier de Berti Bertemes dien eenzegen ass, die schonn 1997 derbäi war. Mee dat huet keng Roll gespillt. D'Géraldine Posing, d'Irène Zeimes, de Berti Bertemes, den Nico Dabé an den Tom Kraemer ware vum Ufank un e „winning team". Quirlech, wibbelech, ofwiesslungsräich, beandrockend, modern, erfrëschend, häerzergräifend, lëschteg an iwwerzeegend hu si d'Programmer 2009 an 2010 op d'Bühn bruecht. Mat dëser Equipe ass et mir net baang em de Kabaret Sténkdéier!

Mee och hanner der Bühn, hanner de Kulissen, huet sech  esou munches gedoen: D'Bruna Gorza mecht d'Assistenz, de Carlo Müller huet de Bau vun den Decoren iwwerholl, an de Claude „Sibi" Sibenaler këmmert sech em d'Fotoen an d'Filmer fir den Internet. Si hu sech all ganz gutt an d'Equipe erafonnt an op dëser Plaz ging ech hinne gär vu ganzem Häerz merci soen.

An ech hunn den Androck, léif  Lieser, wéi wann Dir dësen neie Wand och gespuert hätt, wéi wann Dir dëse Wiessel och esou gingt emfannen. Ni hate mir esou vill Nokuckerten a ni war eise Public esou zefridde wéi an dienen zwee leschte Joeren! Kabaret ass „in" zu Lëtzebuerg. D'Leit gi gär an de Kabaret a si genéissen et, wann „déi do uewen" iewer och si selwer op d'Schëpp geholl oder duerch de Kakao gezu ginn. Et ginn esou vill Leit an de Kabaret, datt verschidde professionell Theatere schonn e bëssen neidesch op de Succès vun der „Klengkonscht" kucken a sech froen, wat si solle maachen, datt och si méi Leit an hir Säll lackelen.

„Ass näischt an der Zeitung?", freet dann de Berti eng Woch virun der Première. De Remy, dien sech em d'Reklamm këmmert, gëtt bei dëser Fro ëmmer liicht verdrësslech. Hien erkläert eis dibbelchersgenee, datt hien un all Zeitung, un all Radio de Pressetext mat Fotoe geschéckt huet, an datt hien et och net verstoe kann, datt nach keen eppes bruecht huet. Komesch, mengt de Berti dann, wäit iwwer 3000 Leit kommen de Programm kucken… an d'Medien hunn nach net reagéiert.

Do ass eppes drun! Et versteet een net ganz, firwat dat esou ass. Vill Leit, déi bei eis just op de leschte Stëppel nach eng Plaz kritt hunn, bekloen sech, datt si näischt gewuer gi wiren. Da muss de Remy sech nees verdeedegen an drop hiweisen, datt hien nach eemol iwwerall intervenéiert ass ... wat dann och meeschtens eppes bruecht huet.

Mee esou ass dat hei zu Lëtzebuerg. Natierlech si mir méi frou iwwer vill zefridde Leit an eng e bësse méi onmotiwéiert Press, wéi iwwer eng déck zefridde Press an nëmmen e Grapp och nach onmotiwéiert Leit. Et sief! Op alle Fall huet de Kabaret Sténkdéier iwwer déi lescht 15 Joer bewisen, datt ee Projet och kann Erfolleg hunn, ouni datt an der Press groussen Tamtam gemaach gëtt. An dat ass dach och eppes wäert!

Mee komme mir zréck bei eist drëtt Buch. Jo, et ass schonn dat drëtt: „Modern Welt – Aus de Programme vum Kabaret Sténkdéier 1990 bis 2000" war dat éischt, „Gutt ze wëssen – Aus de Programme vum Kabaret Sténkdéier vun 2001 bis 2005" war dat zweet an elo läit mat „Méi ass et net – Aus de Programme vum Kabaret Sténkdéier 2006 bis 2010" dat drëtt vir. „Méi ass et net" soe mir ëmmer, wa mir schreiwen, wann eppes esou einfach an esou kloer ass, datt et net méi brauch, och wann een am léifsten nach dëst oder dat ging derbäiflécken. „Méi ass et net" soe mir och, wa mir am Prouwe sinn a mierken, datt e Stéck gutt leeft, funktionéiert, datt et mat einfache Mëttelen dat ausseet, wat et soll aussoen. „Méi ass et net" soe mir och ganz dacks zu de Leit, no de Virstellungen, beim Patt, wa mir iwwer dësen oder dien Text diskutéieren, a si Saachen dra siche ginn, un déi mir ni geduecht haten.

Den Tom Kraemer, de Remy Kraus an ech, mir schreiwen elo schonn zanter bal 15 Joer Texter zesummen. Ëmmer nees froen d'Leit, wie vun eis dann elo wéi een Text geschriwwen hätt. Ëmmer nees gi mir déi selwecht Äntwert: Mir schreiwen zesummen! Wéi muss een sech dat virstellen? Ma ganz einfach: eemol an der Woch komme mir mëttes am Café littéraire zu Miersch an der Maison Servais zesummen an dann diskutéiere mir, wat alles esou an der Lescht geschitt ass an iwwer wat mir kënnte schreiwen. Hu mir eis da fir eppes entscheed, da schreiwe mir dat zesummen. Jiddereen huet seng Iddien, seng Formulatiounen, seng Preferenzen. Jiddereen dréit seng Pefferkäre bäi an op eemol ass den Text fäerdeg. Méi ass et net.

Dofir fannt Dir, léif Lieser, weder an dësem Buch nach op de Programmziedelen vum Kabaret Sténkdéier jemools den Numm vun engem vun eis dräi ënnert engem Text. Mir hunn en ëmmer zu dräi zesumme geschriwwen. Ech weess net ob et dowéinst ass, oder ob et einfach ass, well mir eis gutt verstinn, vu Grond op respektéieren, ähnlech ticken oder wat och ëmmer: nach ni hunn ech an eisem „Schreiwerteam" och nëmmen die klengsten Näid, dat geréngst Konkurenzdenken oder dat liichste Mësstraue gespuert. An dat ass wahrscheinlech genee de Grond, firwat mir et ëmmer nach, och no 15 Joer, fäerdeg bréngen, en neie Programm op d'Bühn ze kréien.

Méi ass et net!

Roland Meyer

am Abrëll 2011